Aikari gukaya nyota, Segera-Laikipia

Aikari a itura ria Nyakumu mwena wa Segera kaunti-ini ya Laikipia nimaikitie ihoya kuri thirikari ya kaunti iyo makiuria irutithanie wira na thirikari nene niguo imakire ndemu iria ikumateithiriria kunina thina wa maai uria umagumiire.

Aikari aya maugite makoretwo magithinika niundu wa wagii wa maai mwena ucio na njui iria merigiriire niciambiriirie kuhua kuumana na urimi uria utabanagio mwena wa rugongo wa ruii rou.

Bunda ikuite matangi na aikari mena mitungi mugongo niyo mbica ironekana barabara-ini ya itura ria Nyakumu kuria aikari memihango-ini ya gucarania na maai.

Aikari aya maugite matikoretwo makiona maai gwa kahinda karaya riu onathengia yagukorwo kwina ruui mwena ucio thina uria maugite ucungirirwo  ni andu aria matabanagia urimi mwena wa rugongo wa  ruui rou kuona niyo mahingagiriria maai mau na gucungirira ruui rou kuhua. 

Atumia kuuma itura riri marakaya makiuga miturire yao niirituhite kuona marathii ngendo ndaya magicaria maai na oho maugite maai maria marahuthira riu matikinyaniirie ikiro cia kuhuthirwo micii-ini tondu ti matheru.

Aikari aya maugite thina uyu niukwenda gwetherwo kihonia naihenya kuona riu maraikara na hahu ya kugumirwo ni ng’aragu tondu ona gutiri irio cia kuigana na iria ciikuo niciambiriirie guthuka kuumana na wagii wa maai.

Leave a Reply

Your email address will not be published. Required fields are marked *