Andu 4 kwirikana nimakuite kuumana na ng’aragu Baringo na Turkana

Thirikari niyaniriire ati makiria ma andu mirioni imwe guuku bururi-ini mari hatikaini ya kugumirwo ni ng’aragu. Gukinyagia na riu andu ana marerikana gukua kuumana na ng’aragu kaunti-ini cia Baringo na Turkana.  Kaunti ikumi na igiri makiria kuuma rugongo rwa bururi nicio ihutitio na njira nene ni thiina uyu, kuria kinyagia mahiu makuite.

O ringi kimera kia riua nikigumiire bururi, na akenya nimarikitie kuigua urugari uyu, kaunti iria igumagirwo ni riua na njira nene riu ikihoya uteithio wa irio hamwe na maai niguo kuhonokia mioyo hamwe na mahiu mao.

Kaunti cia Turkana , Mandera Garissa, Makueni , Kajiado, Isiolo, Kilifi, Tana River hamwe na ingi ciothe ikumi na igiri nicio igumiirwo na njira nene, akenya mirioni imwe makihoya uteithio wa irio na maai.

Gukinyiria riu andu eri marerikana gukua ituura-ini ria Silale Tiaty Baringo, kuria angi eri marerikana gukua o kuumana na ng’aragu Turkana ya gatagati kuringana na thirikari ya kaunti iyo.

Ng’aragu ino yumanite na gucererwo kwa mbura ona ya maguna ng’ombe, na mbura ya muthia wa mwaka muthiru ndiari njiganu.

Matuura ma Kieni kaunti-ini ya Nyeri, Mukogondo, Lamuria na Mutara na Ngobit kaunti-ini ya Laikipia na Ndaragwa kaunti-ini ya Nyandarua ni mangi ma maria magumiirwo ni ng’aragu.

Leave a Reply

Your email address will not be published. Required fields are marked *