Andu aitu, ni tutige kuragana

Mwaka wa 2019 waihurite riboti cia kieha na hahu  cia andu kuragana na angi kwiyuraga guuku bururi-ini. Kuuma riboti cia aciari kuraga ciana ciao ni mbara cia mucii nginya andu kugerana na kwigera ngero ni undu wa wendo, bururi waihurite ndeto na riboti cia magigi.

Novemba19, 2019 bururi wokiririo ni ndeto cia kieha ciigii mu-mbiraru uria wikuerio kuuraga mutumia wake  Joyce Syombua na ciana ciake igiri, Shanice Maua wa ukuru wa miaka 10 na Prince Michael na njira ya magigi

Octoba ya mwaka-ini  o ucio, Charles Muriuki kurerikana oragire mwana wake wa ukuru wa miaka 11 thutha wa kuhitania na mutumia wake

Kuri mweri wa kanana, kaunti-ini ya Nyandarua, muthuri wa miaka 30, ahundukiire muriu wake na kumuthecanga na kahiu na agicoka kwiyuraga gitumi kiri ati mutumia wake niaregete kumuohera mahitania.

Ici ni riboti imwe cia iria cionekanire mwaka-ini wa 2019. 

Mwaka-ini uyu, riboti ya ciana igiri kuragwo mwena wa Murera niundu wa thiiri wa ciringi ngiri 70 niyamurikirwo ni ceceni-ini ya Inooro tv, riboti yaihurite kieha na kiriro

Kuringana na riboti ya Counting Dead Women Kenya, atumia 46 nimakuite gatagati-ini ka mweri wa mbere na wa gatano mwaka-ini wa 2019 niundu wa njuragano cia ki-wendo na bamiri kuhitania. 

Kiuria kinene ni, hihi niki gitumi kia riboti ici kuongereka bururi-ini? Niki gitumi kia andu kuragana niundu wa wendo kana kuhitania bamiri-ini? Nikii gitumi kia muthuri kuuraga ciana ciake na mutumia na njira ya magigi?

Hihi ni ugima wa meciria uracungiriria maundu ta maya ma kumakania?

Atarani megii ugima wa meciria nimanyitithanitie ciiko ici cia kuragana na mirimu ya kimeciria. Mirimu ino icungagiririo ni maundu ta uhuthuri wa njohi, ndawa cia kerebia, ihoru, uthini na mirimu ingi ya meciria ta Schizophrenia, bi-polar disorders na delusional disorder.

Uthuthuria wonanitie ati umwe hari Akenya ana ari murimu wa meciria bururi-ini. Oho kuri arigitani 88 a kurigita mirimu ya meciaria bururi-ini na atungati a arwaru makiria ya 400 moi kurigita mirimu ya meciria. Bururi wina thibitari 14 iria irigitaga mirimu ino. Hena bata wa thirikari guthingata na kubundithia andu uhoro wigii mirimu ya meciria niguo guteithiriria hari kugiririria ciiko cia uragani na marakara mena ikiro cia kumakania.

Njatukano cia micii niciongererekete guku bururi-ini na hena bata andu guthingatwo kwariria atarani niguo kugiririria andu kuiganiririra marakara magakinya handu ati kuragana nikio kihonia kia njatukano icio. 

Andu kuaga wendo kuuma kuri aria mamarigiciirie no gitumi kingi kia mundu gukorwo na meciria ma kuragana na nikio hena bata andu kuonania wendo makiria kuri aria maronekana mahinyiririkite.

Hena bata wa andu gucokaniriria nakuariria ndeto ici iria cihurite magigi niguo tumenye kihumo giacio na tumenye uria tuguteitheriria kugiririria maundu ta maya. Na oho Akenya mathomithio ciigi mirimu ya meciria na uria irigitagwo

Leave a Reply

Your email address will not be published. Required fields are marked *