Arutwo a JKUAT kururungana magitetia uhaguku wa ugitiri

University ya Jomo Kenyatta niihingitwo kwa ihinda ritoikaine kuumana na mururungano wa arutwo aria  meyumiririe barabara-ini nene ya thika  makimenereria uhaguku wa ugitiri mwena ucio kuria tharikira cia arutwo ciongererekete.

Mururungano uyu ucungiriire arutwo 9 guikio ngono na angi aingi kugurara amu borithi kuuma ceceni 4 nio mekinyirie guthararia mururungano uyu kuria ona muingi unyitaniire na maobitha aya hari kuhitana na kuhura arutwo aya.

Kwa ihinda ria mieri 9 arutwo kuuma university ya JKUAT marurunganite maita meri riu na gitumi kia mirurungano ino gikoretwo kiri uhaguku wa ugitiri mwena ucio wa juja kuria arutwo aya makoretwo magiteta ati nimaratharikirwo, kuhurwo, kuiywo ohamwe na angi kuuragwo ni mikora iria ikoretwo ikimoheria magithi na kuuma thukuru.

Ni mururungano ucungiriire muhatikano munene wa ngari barabara-ini nene ya thika amu arutwo meyumiririe kwa wingi makiuga cia igana ni cia igana kuona makoretwo magiteta kwa ihinda iraya riu ati kwina uhaguku wa ugitiri no gutiri ikinya riri ria tacukio niguo kumaninira thina uyu.

Maobitha a borithi kuuma juja  nimeyumiririe niguo gutharari mururungano uyu kuria makuhuthagira ndogo ya guita maithori  na thutha wa kahinda kanini borithi mongererwo kuuma mwena wa thika ,ruiru na gatundu na itanya ria kuhitana na arutwo aya.

Ni mururungano uthire nambere kwa ihinda iraya kuria arutwo 9 maikirio ngono na aingi aingi matigwo na guraro amu muingi kuuma mwena ucio wa juja  unyitaniire na maobitha aborithi gutharikira arutwo aya methaite na miti na mahiga.

Kuumana na mururungano uyu urugamiriri wa university ino niurutite watho wa kumihinga kwa ihinda ritoikaine na gukinyiria mathaa ma thita cia miarahu arutwo othe mekwagiriirwo gukorwo mainukite

Leave a Reply

Your email address will not be published. Required fields are marked *