Diocese ya Catholic Mombasa kuhimbiria hinya wa solar handu ha thitima

Wabici cia Diocese nene ya  kanitha  wa Catholic, kaunti-ini ya  Mombasa  nicio  cia mbere kwaga kuhuthira hinya wa thitima, na ciihokaga  mitambo ya kuhuthira riua ya solar, iria irutaga hinya muingi kinya ukaaga gwa kuhuthika. Hinya wa mitambo  ya solar, ugaruragwo na mitambo igathikitwo kanitha-ini ucio, na ikahuthika na mawira mothe ma kumurika wabici-ini icio na kuhuthika ona mutambo-ini wa gukua andu a lift nyumba-ini ya ageni ya ngoroba inya iria yakitwo ni kanitha ucio. Hari hinya wa muigana wa ngiri mirongo kenda  na mugwanja uria urutagwo ni mitambo ino, no muigana wa ngiri igiri uhuthagirwo.

Kaunti ya Mombasa ni kumwe gwa kuria kuri urugari wa gikiro kia iguru guuku bururi-ini, uria ukoragwo gatagati-ini ka Degree 24-28. Makiria ya mathaa kenda o muthenya guuku Mombasa gukoragwo na riua ihiu, andu aingi guuku magiikara na inyatha na nguo itekumanyita niundu wa urugari.

Ni urugari uyu na utheri uyu wa riua, uria giikaro kinene gia kanitha wa Catholic Archdiocese ya Mombasa, urahuthira na njira ya kuutega ukihuthira mitambo magana matatu ya kuhuthira riua ya solar iria itegetwo mabati-ini ma nyumba cia giikaro giiki. Hinya uyu wategwo na mitambo ya solar, ucokaga gutumwo mitambo-ini ya kuugarura na kuutua hinya ta wa thitima, uria ucokaga gutumwo mitambo-ini ingi iria iugayanagia na kuutuma mitambo-ini ngurani ya kuhuthika.

Kanitha uyu rungu rwa muthikabu munene Martin Kivuva, niwakite nyumba ya ageni, iria iri na ngoroba ithano, igathikitwo mitambo ya kuhurana na urugari wa Mombasa, mitambo iria irahuthiraa hinya uyu wa solar. Niguo kwambata ngoroba o yothe kana guikuruka, ukubatara kuhuthira mutambo wa kirini, uria urahuthira o hinya ucio wa solar.

Nyumba cia toro cia nyumba ino, irahuthira ngirobu iria irahuthira hinya o ucio, mitambo ya gwithamba, mitambo ya kuhurana na urugari thiinii wa nyumba ici onayo ikihuthira o hinya ucio wa solar. Na niundu wa riria kungikorwo  gutari na urugari  kana  riua ria kuigana, iguru ria nyumba ino kuri  na  mitambo ya guteithiriria mitambo ya solar, iria imiheaga hinya wa  kuruta  hinya  uria urabatarania.

Kenya irutaga thitima muigana wa Megawatts 2,250, na urabatara Megawatts 1,802, thi ng’ima ikiurio gwetha  thitima na njira itarahuthira maguta ma ndithuru  maria kuumana na ndogo ya mitambo mathukagia maria maturigiciirie. Mitambo ino ya solar ya kanitha ino iraruta thitima Megawatts ngiri kenda no irahuthira o Megawatts ngiri igiri.

Leave a Reply

Your email address will not be published. Required fields are marked *