HOME kana ROME? Referee Bjorn Kuipers nĩwe ũgathakithia ngumuthũrano ya England Vs Italy mbĩtĩka-inĩ cia #UERO2020Final

Referee Bjorn Kuipers ni amuritwo ni kiama kia UEFA niguo akahurithia ngucanio ya final ya mbitika cia Euro, iria igakorwo gatagati-ini ga timu ya bururi wa Ngeretha na timu ya bururi wa Italy.

Referee uyu uria wiina ukuru wa miaka 48 ena umenyo wa ihinda iraya kuona ni akoretwo akihurithia ngucanio cia rigi ya bururi wa Holland kuuma mwaka-ini wa 2005, na ni ahurithangitie ngucanio itiganite cia mbitika cia irabu njorua gitaru-ini giki thutha wa kwambatirio ngathi ni kiama kia UEFA.

Referee Bjorn Kuipers aciarirwo miaka 48 mihituku bururiini wa Holland, na wiira wake hari ngucanio 3 iria athakithitie mbitika-ini ici ni ukenetie kiama kia UEFA kiria kimwamurite guthakithia ngucanio ya final ya Euro muthenya wa kiumia, kuria ngucanio ino igacemanithia timu ya bururi wa Ngeretha na timu ya bururi wa Italy.

Bjorn agateithiririo ni aruna aake eeri a kuuma o bururiiini ucio wa Holland Sander Van Roekel hamwe na Erwin Zeintra. Carlos Del Cerro wa bururi wa Spain akiigiririka ta abithaa wa kana uria uikaine to Match-Commissioner.

Referee uyu anjirie kuhurithagia ngucanio cia rigi ya bururi wa Holland kuuma mwaka-ini wa 2005, na miaka 4 thutha ucio akiambatirio ngathi guthakithagia ngucanio cia mbitika cia irabu iria njorua gitaru-ini kia ruraya ni kiama kia UEFA.

Mwaka-ini wa 2013 niwe wathakithirie ngucanio ya final ya UEFA Europa League gatagati-ini ga timu ya Benfica na Chelsea. Mwaka umwe thutha ucio agithakithia ngucanio ya final ya mbitika cia UEFA CL gatagati-ini ga timu ya Real Madrid na timu ya Atletico Madrid ciothe cia bururi wa Spain.

Ngucanio ino ya final igathakirwo kihaaro-ini kia Wembley bururiini wa Ngeretha muthenya wa Kiumia.

 

 

 

 

 

Leave a Reply

Your email address will not be published. Required fields are marked *