Muthuri umwe guthinga mutumia wake na superglue kiiga-ini kia uciari, matu na kanua, Kamatungu-Tharaka

Kwiragwo mathanwa mari kiondo kimwe matiagaga gukong’orania na maya ma kihiko kia James Kifo, makong’oranitie na gutiga andu makiona na tunua maitho mari ugeni.

James Kifo ni mundurume ukoretwo akiimathira mwena wa Nairobi guku mutumia wake na mwana mari gicagi, mwena wa Kamatungu gicigo-ini kia umbunge gia Tharaka ya muhuro.

Kifo, ehithanirie na akiinuka kuuma o Nairobi nginyagia Tharaka na riria akinyire akira mutumia mathii riuriro-ini, amu amenyeka oimite Nairobi niekugirwo kuona kuri na watho wa kugiria andu kuingira/kuuma Nairobi.

Riria ringiari ihinda ria kumatia wendo wao makiria, rikigaruruka na gutuika ihinda ria kiriro, mukayo na ruo kuri mutumia uyu na mwana wake.

Thabari-ini yao ya guthii kwihitha, magikinya ruui-ini rwa Kathita kindu 10pm, na hau Kifo agiatha mutumia wake arute nguo na amutaririe arume aria akoretwo agikoma nao. Thutha wa mutumia wake kuhindahinda kuruta nguo, agitungio mbaara na agikirukio hinya na muthia-ini agiciruta.

Kifo akihingura muhuko aari naguo akiruta biribiri, cumbi, itunguru na agicitindikiriria na kahiu kiiga-ini gia thiri kia mutumia uyu, agicoka akioya tiiri akiutukania na superglue na akimuthinga kiiga-ini o giki, matu na kanua.

Agika maya mothe anengerete mwana wao wa miaka itatu toci niguo amumurikire amu kwari na nduma ndumanu. Kiriro kia mwana uyu nikio gietire andu aria moire mutumia uyu na kumuhanyukia thibitari-ini.

Riu mundurume uyu ari riuriro-ini no borithi nimarethana nake.

Leave a Reply

Your email address will not be published. Required fields are marked *