Ni mucii wa ciana cia ndigwa kana ni thoko ya ciana?

Ciumia igiri thutha wa atumia eri guikio ngono magikuruhanio na ngungo ya kwendia ciana, muingi wa Mathare riu niwiyumiritie na kuria thirikari ithuthurie na kinyi mihang’o iria ithiaga na mbere mucii-ini wa ciana wa Good Samaritan.Mercy Mburu umwe wa aria maikitio ngono, niwe murugamiriri munene wa Good Samaritan Children’s Home, mucii uria muingi ugite arahuthira uru gwitongia.

Kwa ihinda iraya mucii uyu wa Good Samaritan, uikaine ta giikaro gia ciana cia ndigwa na iria ciumite micii itehotete, niguo kumahe gia kuria, kunyua, githomo o undu umwe na kiraro

No ciumia igiri hituku, kanya ka ndeto karatumurwo, thutha wa murugamiriri munene wa mucii uyu Mercy Mburu na ungi Rahab Wanjiru guikio ngono magikuruhanio na uici na wendia wa ciana, thutha wao kunyitwo na kana ka mieri itano, karia ruhonge rwa borithi rugite ekuirwo aya eri mendaga gukendia.

Kuringana na aikari, aingi ao aria marereirwo mucii-ini uyu, kwaya gukorwo ti ria mbere giathi ta giki kiratabanio.

Ni miaka iri riu kuuma mwana wa Teresia Wanjiru ore. Kuringana na Wanjiru, mwana wake atindaga mucii-ini uyu, o nginya muthenya umwe akiura na njira ya kiriga.

Kuura kwa mwana uyu guthitangitwo gwa borithi, na ona kuri o uguo, aikari maugite murigo munene uhurukiire ciande-ini cia mucii uyu.

Kwirikanite ati ihinda na ringi, gutiagaga andu a wendi mwega aria mokaga kurehera mucii uyu uteithio, no ona kuri o uguo, aikari makauga uteithio uyu ndukinyagirio ciana ici uria kwagiriire.Aikari maihuirwo ni matukuya, magituonia ngondoro na miringiti mieru, iiganiriirwo rumu-ini imwe, no kuria ciana ici cikomaga, ni miariro mithiru na mitarukangu.

Riu aikari aya nimoritie thirikari guthuthuria na kinyi mihang’o iria ithiaga na mbere mucii-ini uyu.

Mercy niarekereirio na mbodi ya ciringi ngiri magana meeri, na ciana ciothe iria irari nyumba-ini ya Good Samaritani ikoywo ni thirikari rungu rwa ruhonge rwa guthaitira ciana.

Leave a Reply

Your email address will not be published. Required fields are marked *