Somalia kwina thayu, Akenya kuurio mathare mieke ya biacara kuu

Riria  bururi  wa Somalia wagwetwo,  mbica iria icoraga meciria-ini  ma aingi ni  haaro, njuragano  na njama cia unyitani  migwate. No thutha  wa  mbiraru  cia  KDF kuhurana  na  itoi  cia Al-shabaab  na  kuhatura  matuura  maingi  kuuma utongoria-ini wa gikundi giki gia itoi,  thayu ni ucokete  na biashara nyingi kuhingurwo.

O muthenya,  kiharo-ini kia ndege kia Jomo Kenyatta, ndege igiri ni ciumbukaga irorete bururi wa Somalia, ikuite ahuri biacara, aruti wira a ikundi itari cia githirikari, oro hamwe na jeshi cia mabururi ma Africa, nio AMISOM. Kahinda kahituku, gutiri ndege irathiaga bururi ini wa Somalia tiga cia jeshi, kuona ati ugitiri niwahagukite na gikiro kia iguru.

Mbica iria ciaumaga Somalia, ciari o  cia jeshi ya Kenya KDF, makirua na itoi cia gikundi kia Alshabaab, undu uria watumaga andu aingi metigire bururi uyu. Na thutha wa jeshi ya Kenya kuhatura mataoni maingi kumana na wathani wa Alshabaab, riu thayu niucokereirie bururi ini uyu, ta uria Brigadier Dickson Ruto, uria urugamiriire jeshi ya Kenya bururi ini wa Somalia aratariria.

 kuringana na baruthi wa Kenya bururi ini wa Somalia Lucas Tumbo, kuri na thayu  bururi-ini  ucio  na  Akenya aingi  nimaigite  biashara. Jeshi ya  mabururi ma Africa rungu rwa AMISOM ikoretwo ikiiga thayu kahinda  ka  miaka mugwanja na  riu  baruthi tumbo araringiriria akenya  mathii maigithie bururi-ini ucio  na marute mawira matiganite. Riu jeshi cia AMISOM, ciguthii na mbere kuiga thayu na guthomithia jeshi ya Somalia maundu meigii ugitiri, o nginya mwaka wa ngiri igiri na mirongo iri na imwe riria merigiriirwo gukauma bururi uyu.

Leave a Reply

Your email address will not be published. Required fields are marked *