Ucamba wa maabithaa a borithi itharikira-ini ria itoi, Riverside Nairobi.

Maabithaa a borithi kuuma honge itiganite manyitaniire na andu matiganite marateithiririe mihang’o ya kuhonokia makiria ma andu magana mugwanja aria marari nyumba-ini iria iratharikiirwo ni itoi.

President Uhuru Kenyatta, minister wa ugitiri Fred Matiang’i na atongoria matiganite nimatugiritie kwihotha kwa akenya. Rirari ihinda ria kuhehenja ngoro kuona andu a nyumba na endwa makionana, thutha wa mathaa maraihuirwo ni guoya, nduma na gikuu.

Ucamba wa abithaa a borithi hari kung’ethanira na thu ya thayu, ihinda-ini ria kuhonokia aria maranyititwo migwate ni itoi cia Alshabaab, nyumbaini ya Dusit guku Nairobi, niguo utumite matugirio ni President Uhuru Kenyatta na atongoria ,matiganite

Ihinda inini thutha wa riboti ya itharikira riri gutherema, na camera citu gukinya nyumba-ini ino, abithaa a kugacirithia ugitiri, maraitikite ta mbura kung’ethanira na itoi ici….

Muthuri uyu, Inayat Kassam uria ni mutaramu na murutani wa kurathukia micinga, ni umwe wa aria mehotaniira ngerenwa ngoroini cia aingi, ni wirutiri wake mihang’oini ino….

Umwe thutha wa ungi, aria maranyititwo migwate marambia guteithurwo, amwe magiithara na maguru, kioneki kia wiyathi munene wa kweherio ugwati-ini, angi nao manyitiriirwo, kurumirira kimako kinene kiria kiramatungire, na angi mari na nguraro itiganiite.

Abithaa aya magithii ngoroba imwe thutha wa ingi, o nginyagia ngoroba ya mugwanja na niyo ya muthia, na kuhonokia makiria ma andu 700.

Ihinda riri andu a nyumba na arata maretererire na mwihoko magiitiria heho ya utuku, o mututhuko watuthuka, ukimahe mwihoko wa kuonana na endwa ao.

Maithori ma gikeno matukaniite na ruo, maranyitithania mutumia uyu na mwari, hamwe na andu angi a nyumba yao, mbica iria ironekire gatagati ka endwa angi kiagagao-ini giki.

Riciria ria ruhonge rwa borithi ria kuruta namba iria mundu uurehithite angirahurire atariririe kuria ari niguo agiirwo ni maabithaa a borithi rirari na uguni munene, andu aingi makiria aria endwa ao marameraga kuria mehithite makihuthira itharaita riri kuima itoi mweke wa kuraga endwa ao.

Leave a Reply

Your email address will not be published. Required fields are marked *