Uthuthuria kuonania ngenge nyingi ikuaga ihinda-ini ria thiku 28 Nairobi

Uthuthuria uria wikitwo ni ruhonge rwa uthuthuria wa mirimu, KEMRI, rugiite ati ngenge nyingi guku Nairobi, irakua ihinda-ini ria thiku 28 thutha wa guciarwo, ni kwaga urigitani mukinyaniru. KEMRI yugite ati hari ciana 1000 iria ciaciarwo kaunti-ini ya Nairobi, 39 nicio ikuaga ona itanakinyia thiku 28.

Ona thengia ya honge itiganite cia andu kiumbe, cia thirikari o undu umwe na ngwataniro itari cia githirikari, guka hamwe niguo kuhurana na ikuo cia ciana cia ngenge, ruhonge rwa uthuthuria wa mirimu KEMRI, rugite waagi wa thibitari iria ciri na utaramu wa kurigita ciana cia rukenge nigucangiire haraya hari ikuo ici kaunti-ini ya Nairobi.

Uthuthuria uria wikitwo ni KEMRI wonanitie ati kaunti ya Nairobi iri na thibitari 33, iria itukanite cia muingi, cia andu kiumbe o undu umwe na cia makanitha, iria ciri na uhoti wa kuheana mootungata ma ciana cia rukenge mathaa mirongo iri na mana o muthenya. Hari thibitari ici , 4 nicio cia muingi na nikuo atumia aingi mahotaga gukomia ciana ciao cingiciarwo iri na murimu ona kana cinginyitwo ni murimu thutha wa guciarwo.

Hari ciana 1,000 iria ciaciarwo, 39 nio makuaga thibitari-ini cia Nairobi ihinda-ini ria thiku mirongo iri na inyanya thutha wa guciarwo. Umwe hari ciana ithano iria ciaciarwo ni abataraga urigitani wa mwanya, no hakuhi nuthu ya ciana ici, citihotaga kwamukira mootungata makinyaniru, amu thibitari nyingi itiri na macini na utaramu wa gutangikira ngenge. Guciarwo mbere ya ihinda rikinyite nikio gitumi kiria kinyitiriire namba imwe hari ikuu cia ngenge.

Mirimu gutonya thakame-ini o hamwe na murimu wa meningitis, Mathina ma ugima wa mwiri maria meyumbagira nda mwana atanaciarwo, Pneumonia, Kuharwo o undu umwe na tetanus, ni imwe cia ndwari iria icangiire ikuo cia ciana cia ngenge.  Mamwe ma mathina maya mokaga ni atumia kwaga kurorwo wega riria mari aritu, na mangi ni tondu wa kwaga ataramu a kurora ciana ici na ubaciriru matanatorio ni mirimu. Gatagati ka mwaka wa 2017 na 2018, ngenge 10, 241 nicio ciakuire kaunti-ini ya Nairobi.

Leave a Reply

Your email address will not be published. Required fields are marked *